Termos financeiros: Glosario

Sobre Glosario

  • O NFC (Near Field Communication) é unha tecnoloxía sen fíos de curto alcance que permite a conexión entre dous dispositivos ao emitir e recibir sinais de forma simultánea.

    Esta tecnoloxía é a que empregan servizos como Google Pay, Samsung Pay ou Apple Pay, e podes usala coas túas tarxetas ABANCA para pagar directamente en comercios co teu teléfono móbil.

    Para utilizar estes servizos, é imprescindible que o teu dispositivo conte con tecnoloxía NFC e que engadas a túa tarxeta ABANCA na app correspondente (Google Pay, Apple Wallet, etc.).

  • Se te animaches a dar o paso e vas comprar unha vivenda, contámosche todo no que tes que fixarte para que non te leves ningún susto. Dános o mesmo se é unha casa nova ou de segunda man, pero nesta guíaAbrirase nunha nova ventá. explicamoscho todo para cada caso: seguros, hipotecas, Euribor, taxas...

  • A Single Euro Payments Area ou Zona Única de Pagamentos en Euros é unha iniciativa europea que permite que os particulares, empresas e organismos públicos desta zona poidan efectuar pagamentos en euros sen utilizar efectivo, coas mesmas condicións e seguridade ca no ámbito nacional.

    A zona SEPA abrangue todos os países da Unión Europea e mais tamén Islandia, Liechtenstein, Mónaco, Noruega e Suíza.

  • A TAE, ou Taxa Anual Equivalente, é unha corrección do TXN, ou tipo de xuro, que mide o que realmente pagas. Comprende pois non só os xuros do empréstito, senón tamén a parte proporcional de gastos e comisións.

    Por exemplo, se nun empréstito de 100.000 € o TXN é do 3% e a TAE do 4,25%, ao cabo do ano estarás pagando 3.000 € en concepto de xuros e 1.250 € por comisións, gastos de mantemento, apertura e demais.

  • O valor de novo supón unha indemnización polo prezo do coche novo, incluíndo o IVA e impostos de matriculación. O valor de compra é o valor do vehículo no momento da compra.

    O valor venal é o valor do vehículo instantes antes do sinistro, baseado na táboa GANVAMSerás redirixido a outro sitio web que se renova anualmente e que cataloga os vehículos segundo modelo e antigüidade.

  • O Euríbor é o prezo do diñeiro ao que se emprestan os bancos europeos entre si.

    O Euríbor a un ano, que é o índice que se utiliza para as hipotecas, calcúlase facendo a media aritmética dos valores mensuais do Euríbor para depósitos a un ano. É dicir, calcúlase diariamente a qué tipo de xuro se emprestaron os bancos o diñeiro entre si para ese produto en concreto, faise a media mensual e despois publícase no BOE. É a referencia máis común para calcular os xuros hipotecarios. 

  • Aínda que a miúdo na fala coloquial tratamos estes dous termos como se fosen sinónimos, o cierto é que na linguaxe especializada bancaria crédito e préstamo son conceptos lixeiramente distintos.

    Un préstamo ou empréstito é unha operación pola que ABANCA che dá unha cantidade de cartos concreta dunha soa vez, por un prazo determinado, e ti comprométeste a volver os cartos e mais os xuros nos prazos ou cotas que pactásemos (mes a mes, trimestralmente etcétera). Cada cota que pagues incorpora dous conceptos: a devolución ou amortización do capital que pediras, e os xuros que se xerasen polo capital que aínda teñas para devolver. Ao que remates con todas as cotas considérase o empréstito cancelado e a operación está liquidada.

    O funcionamento do crédito é máis parecido ao dunha conta corrente, coa particularidade de que os cartos, ata o límite que estea fixado, están ao teu dispor para que cubras as túas necesidades financeiras. Nun crédito non se che ingresan todos os cartos de vez, senón que ABANCA che vai entregando cantidades parciais a medida que o necesites. Por iso só se che cobran xuros sobre a cantidade que utilizases realmente. De todos os xeitos, nalgúns créditos tamén terás que pagar unha comisión polo diñeiro que non utilices, pero que teñas dispoñible.

    Por esta razón, se ben o que che custa un préstamo xa o sabes dende o comezo, o custo dun crédito só o podes coñecer cando ABANCA liquida o crédito, que normalmente é cada trimestre. Outra das vantaxes do crédito é que aínda que se concede por un prazo concreto, cando se chega ao final dese período pódese renovar, ou mesmo ampliar. O crédito é normalmente un produto financeiro que utilizan as empresas para cubriren as súas necesidades de tesourería, e o seu uso está pouco estendido entre os clientes particulares.

  • As persoas físicas consumidoras son aquelas que utilizan a súa conta para xestións persoais, gastar e aforrar os seus cartos; porén as persoas físicas non consumidoras son aquelas que ademais a utilizan para fins económicos, comerciais ou profesionais.

    Por exemplo, un avogado que cobra a nómina na súa conta, aforra e gasta parte dese diñeiro, é considerado unha persoa física consumidora. Mais outro avogado que tivese domiciliada a súa cota de autónomos na conta, emita recibos e teña unha TPV asociada a ela, sería unha persoa física non consumidora.

    Se queres saber exactamente en cal destas categorías entrarías, podes preguntar en calquera das nosas oficinas para que cho confirmemos.

  • Documento que acredita se unha persoa outorgou testamento, en que data e ante que notario. A solicitude deste certificado non poderá realizarse ata que transcorran 15 días hábiles desde o falecemento. Solicitarase por escrito e deberá acompañarse do Certificado de Defunción, en formato orixinal ou copia compulsada. O certificado de últimas vontades pódese solicitar dos seguintes modos:

    • Presencialmente, nas Xerencias Territoriais do Ministerio de Xustiza.
    • Por correo, enviando a solicitude á dirección: rexistro xeral de Actos de Última vontade - Ministerio de xustiza, praza Jacinto Benavente, 3 - 28012 Madrid.
    • Solicitude por internet, na web www.mjusticia.gob.esSerás redirixido a outro sitio web

    Para solicitar este certificado, haberá que pagar a taxa correspondente, modelo 790. (Esta taxa pódela pagar desde ABANCA).

  • Documento oficial emitido polo Rexistro Civil que acredita o falecemento da persoa. Este certificado pode solicitalo calquera cidadán que así o requira. Pódese solicitar dos seguintes modos:

    • Presencialmente, acudindo persoalmente o interesado ao Rexistro Civil onde estea inscrito o falecemento, achegando o D.N.I. da persoa que solicite o certificado.
    • Por correo, enviando unha carta ao Rexistro Civil indicando o nome e a dirección postal á que se vaia enviar o certificado, facéndose constar na solicitude os seguintes datos:
      • Nome, apelidos, e D.N.I. da persoa que solicita o certificado.
      • Nome e apelidos do falecido e lugar e data do falecemento.
      • Tipo de certificado que se necesita (normalmente literal).
      • Teléfono de contacto para o caso de que haxa que aclarar algún dato.
      • Por internet, a través da web www.mjusticia.gob.es

  • O testamento é o acto polo cal unha persoa dispón para logo da súa morte de todos os bens ou de parte deles.

    Necesitarase o orixinal ou unha copia autorizada do último outorgado, que lle poderán solicitar os herdeiros ao notario ante quen foi outorgado ou o que teña ao cargo o protocolo (esta información vén indicada no Certificado de Últimas Vontades).

  • Documento notarial ou xudicial polo que se determina quen son os herdeiros dunha persoa cando non outorgou testamento ou o outorgado perdeu validez ou é nulo. Esta declaración pódeselle solicitar ao notario da localidade onde residía o defunto por medio de acta notarial, no suposto de ser os herdeiros o cónxuxe, ascendentes ou descendentes; ou ao xuíz de Primeira Instancia, cando resulten ser herdeiros outros familiares. Neste caso, a lei determina quen son os herdeiros e a parte da herdanza que lles corresponde. O período de tramitación da declaración en caso de ser notarial é aproximadamente dun mes e medio, e en caso de declaración xudicial dependerá de cada xulgado, pero normalmente o prazo é superior á notarial.

  • Documento público outorgado por todos os herdeiros, ou polo albacea contador partidor, no que, no seu caso, liquidan a sociedade de gananciais, parten os bens que corresponden á masa hereditaria e os adxudican e reparten. No caso de que formen parte da herdanza bens inmobles, será indispensable que se formalice ante Notario para poder inscribir a nova titularidade no correspondente Rexistro da Propiedade, coa excepción de que exista un herdeiro único, nese caso poderá tramitar devandita inscrición por medio de instancia.

  • O NRC ou Número de Referencia Completo é un código que xera a entidade bancaria no momento no que realizas o pago dun tributo. Serve para acreditar ese pago ante a Axencia Estatal da Administración Tributaria (AEAT).

    Se necesitas saber o NRC dun tributo que xa pagaches podes consultalo na túa banca electrónica de empresasSerás redirixido a outro sitio web (no concepto do movemento da túa conta) ou na túa oficina de ABANCA.