Que é un fondo de investimento?

Entender os fondos de investimento é o primeiro paso para diversificar o teu capital e investir de forma intelixente. Un fondo de investimento é un instrumento de investimento colectivo. Imaxina un grupo de investidores que poñen o seu diñeiro en común para acceder a oportunidades que, de forma individual, serían difíciles ou moi custosas de acadar.

Este patrimonio común é xestionado por profesionais (sociedade xestora), que invisten o capital en diferentes activos como accións, bonos ou bens inmobles para buscar a maior rendibilidade posible segundo o perfil de risco e a política de investimento do fondo.

O investimento en fondos leva asociados diversos riscos, dependendo da vocación investidora do fondo, os activos nos que invista… o nivel de risco do mesmo variará.

Aínda que hoxe é posible subscribilos dixitalmente a través de entidades como ABANCA, a orixe do primeiro fondo de investimento remóntase a 1774, en Holanda. Tras unha crise financeira, un comerciante holandés chamado Abraham van Ketwich creou o primeiro fondo da historia baixo o nome Eendragt Maakt Magt para ofrecer diversificación a pequenos investidores.

Desde entón, evolucionaron ata converterse na ferramenta para canalizar o aforro da economía moderna cara aos investimentos, permitindo que calquera persoa poida acceder aos mercados globais.

Investir nun fondo implica tres obxectivos claros:

• Diversificación automática: En xeral, ao investir nun fondo, o teu diñeiro repártese en diferentes activos, reducindo o impacto no caso de que un activo ou sector concreto sufra perdas.

• Xestión profesional: Un equipo de expertos analiza o mercado por ti, tomando as decisións de compra e venda baseadas en análises técnicas de difícil acceso para un investidor particular.

• Acceso a mercados globais: Permíteche tomar posicións en grandes empresas, débeda pública internacional ou mercados emerxentes cun investimento mínimo (o importe dependerá da política de cada fondo).

Exemplo: Se queres investir a longo prazo, por exemplo para a xubilación, un fondo de investimento permíteche realizar achegas periódicas para acumular capital. Non obstante, debes ter en conta que os fondos están suxeitos ás fluctuacións do mercado, polo que existe o risco de incorrer en perdas e non recuperar o importe inicialmente investido.

En España, os fondos de investimento están estritamente regulados pola CNMV (Comisión Nacional do Mercado de Valores).

• Transparencia: A xestora está obrigada a publicar un folleto informativo e un documento de datos fundamentais (DFI) para que saibas exactamente a vocación investidora do fondo, os riscos asociados ao investimento nel, os custos e gastos así como o cálculo de escenarios en distintas circunstancias, entre outras cousas.

• Segregación: O teu diñeiro non pertence ao balance do banco. Se o banco tivese problemas, o fondo segue sendo propiedade dos partícipes.

Se queres falar como un experto, garda estas definicións no teu radar:

Non todos os fondos de investimento son iguais nin perseguen os mesmos fins. Para clasificalos, adoitan empregarse tres criterios principais: o tipo de activo no que invisten, o seu estilo de xestión e o nivel de risco.

Segundo o tipo de activo ou onde se inviste o diñeiro

Esta é a clasificación máis común e determina o comportamento esperado do teu investimento:

1. Fondos de Renda Fixa

Invisten en títulos de débeda (letras, bonos, obrigas) emitidos por Estados ou empresas.

2. Fondos de Renda Variable

Invisten a maior parte do seu patrimonio (máis do 75%) en accións de empresas que cotizan en bolsa.

3. Fondos Mixtos

Combinan renda fixa e renda variable en diferentes proporcións. Neste grupo poderás atopar fondos de renda fixa mixta, que invisten como máximo o 30% en renda variable, ou fondos de renda variable mixta, que invisten en renda variable entre o 30% e o 75%.

4. Fondos Monetarios

Invisten en activos de renda fixa a moi curto prazo e con gran liquidez. A duración media da súa carteira é igual ou inferior a seis meses e só poden investir en activos de elevada calidade crediticia. Os monetarios a curto prazo caracterízanse porque a duración media da carteira é igual ou inferior a 60 días.

5. Fondos globais

Son fondos cuxa política non encaixa en ningunha das vocacións anteriores.

5. Fondos Inmobiliarios e Investimentos Alternativos

• Inmobiliarios: Invisten na compra e alugueiro de activos inmobles.

• Alternativos (Hedge Funds ou Private Equity): Empregan estratexias complexas ou invisten en empresas que non cotizan en bolsa. Son produtos máis sofisticados orientados a investidores con experiencia.

Ambos tipos de fondos caracterízanse ademais pola súa falta de liquidez. Tamén atopamos fondos total ou parcialmente garantidos, con rendibilidade obxectivo… Todos os fondos poden ser á súa vez euro ou internacionais, dependendo de se invisten en divisas.

Toda inversión leva riscos, e ser transparentes é a base da confianza. Os principais factores de risco que poden afectar ao teu fondo son:

-Risco de mercado: É a oscilación natural dos prezos. O valor dos investimentos pode oscilar debido á situación económica xeral, tipos de xuro ou eventos políticos.

• Risco de crédito: A posibilidade de que o emisor dun título de renda fixa (un Estado ou unha empresa) teña problemas financeiros e non poida pagar os xuros ou devolver o capital investido.

• Risco de divisa: Se o fondo inviste en activos denominados nunha moeda distinta ao euro (como dólares, iens ou libras), as variacións nos tipos de cambio poden beneficiar ou prexudicar a túa rendibilidade final.

• Risco de liquidez: O risco de que o fondo teña dificultades para vender certos activos da súa carteira de forma rápida a un prezo xusto, algo que adoita ocorrer en momentos de pánico financeiro ou en mercados moi secundarios.

Lembra: A túa tolerancia ao risco e o teu horizonte temporal (canto tempo podes deixar o diñeiro sen tocalo) son os que deben marcar a túa elección.

Canto custa ter un fondo?

A transparencia é total. A maioría dos custos descóntanse directamente do Valor Liquidativo do fondo:

• Comisión de xestión e depósito: Son os custos anuais recorrentes pola administración e a custodia dos activos. Son as comisións máis importantes, xa que remuneran ao equipo xestor e á entidade depositaria. Ademais, os fondos teñen outros custos como os das operacións que afectan igualmente á rendibilidade do mesmo.

• Subscrición e reembolso: Son custos asociados á compra (entrada) ou venda (saída) das participacións. Non todos os fondos de ABANCA aplican comisión de subscrición e reembolso. É necesario consultar as condicións particulares de cada fondo para saber se existe este custo.

• O impacto dos custos: Unha diferenza do 1% en comisións pode parecer pouca cousa, pero tras 20 anos, pode supoñer unha diferenza de miles de euros no teu capital final debido ao efecto do xuro composto.

A gran vantaxe: A "Xanela Fiscal"

En territorio español, os fondos de investimento gozan dunha vantaxe fiscal única e exclusiva que non teñen as accións, os ETFs nin os depósitos tradicionais: a exención por traspaso. É importante que teñas en conta que este diferimento fiscal só é aplicable a persoas físicas residentes e que a fiscalidade pode variar dependendo das circunstancias persoais do contribuínte.